టిఫిన్ల సమస్య

టిఫిన్ల సమస్య 

ప్రొద్దుట లేస్తే, పిల్లలకి టిఫిన్లు ఏమిటి, స్నాక్స్ ఏమిటి, లంచ్ ఏమిటి అంటూ
ఒకతె అంతర్జాతీయ సమస్య. ఇడ్లీలు, దోశలు, ఉప్మా, బ్రెడ్, కార్న్ ఫ్లకేస్ ....
ఎన్ని చేసినా, పిల్లల్ని మెప్పించలేము. మా చిన్నప్పుడు, ఇన్ని సమస్యలు లేవు.

చక్కగా, యే సమయంలో అయినా, ఆవకాయ అన్నం కలిపివ్వమని అడిగి, తినేసేవాళ్ళం. ఆ
రుచి అన్నంలో ఉందో, అమ్మమ్మ చేతి ఆవకాయ లో ఉందో కాని, మహాప్రభో, ఈ టిఫిన్లన్ని
దాని కాలి గోటికి సమానం కాదు. అన్నట్టు, ఆ మధ్య చుట్టలాయన, ఆవకాయలో మల్టీ
విటమిన్స్ ఉంటాయి అన్నారండి, వారికి ప్రత్యేక సన్మానం చెయ్యాలి.
ఇంకా బామ్మయితే, పెద్ద బేసిన లో చద్దన్నం పెట్టి, గిన్నెడు నెయ్యి వేసి,
బెల్లపావకాయ కలిపి, అందరినీ చుట్టూ కూర్చోబెట్టుకునేది. అన్నపూర్ణలా ,ఒక్కక్క
ముద్ద దబ్బకాయంత సైజు లో, ఒంటి చేత్తో, ఎలా చేసి పెట్టేదో, తెలీదు. చిన్న
లడ్డూ కట్టడానికే గిలగిల్లాడిపోతాను నేను. రెండు ముద్దలకే మా కడుపులు
నిండిపోయేవి. నాకు స్పెషల్ పాకేజీ. 'ఓసి, పీక సన్నం పీనుగా, నీ కోసం చిన్న
ముద్దలు చేసి పెడతాను, మెల్లిగా తిను,' అని తినేదాకా ఆగేది. నవ్వుతారండి, మరి
నాకేమో, ఆ తిట్ల వెనుక, ఆవిడ ప్రేమ కనిపించేది. మరి ఇప్పుడో, కాస్త ఆవకాయ
తింటే, కడుపు మంట. అయినా, ఎన్ని తిన్నా, కంచం లో ఏదో ఎర్రగా కనిపించాల్సిందే
ఇప్పటికీ. లేకపొతే, తృప్తిగా ఉండదు. మా పిల్లలకి కూడా కందిపొడి, గోంగూర, ఆవకాయ
ఉంటే చాలు. అన్నీ తరాలకు వారధిగా ఉన్న ఆంద్ర ఇలవేల్పులకి, జై!