ఓ ప్రముఖా !
'ఏమంటిరి ? ఏమంటిరి ? ముఖ పుస్తకము వాడువారు ఖరములనీ, ఖగములనీ ఖరారు చేసితిరా ? ఇంతటి విముఖత కల మీరు ముఖపుస్తకమునకు ఏల రావలె? వచ్చితిరి పో, ఖులాసాగా కబుర్లు చెప్పుకోక నఖశిఖపర్యంతం అందరి ఖాతాలు ఏల పరిశీలించవలె ? చూచితిరి పో, అజ్ఞానఖనులని , ముఖపుస్టక ఖైదీలని, ఏల వ్యాఖ్యలు చేయవలె ? చేసితిరి పో, ఖగోళమున వేరేచ్చటా చోటు లేనట్లు మా చెవులయందు జంబుఖానా వేసుకు ఏల పోరవలె ? కావున ఇది అంతయూ తమ ఖర్మము.
మాకొక్క సందేహము...దేహమున్న సందేహములు సహజము.
ఖర్వమయిన(అధమము) టీవీలు, సినిమాలు చూచి ఖేదము నొందలేక , ఖరాబు అలవాట్లకు బానిసలు కాక, ఖులాసాగా మిత్రులతో ముఖాముఖీ సఖ్యత పెంచుకొనుటకు ,సుఖ దుఃఖాలు పంచుకొనుటకు శాఖోపశాఖలుగా విస్తరించిన ముఖ పుస్తకము ఒక మాధ్యమము. అంతేకాక కాలాన్ని ఖర్చుచేసి, ప్రతిభ పెట్టుబడిగా ఖండ ఖండాన్తరములలో ,ప్రఖ్యాతి నొందుటకు ఆఖ్య(పేరు) నార్జించుటకు ఇది చక్కటి ఉపకరణము. సదుపయోగమూ చేసిన ఖ్యాతి, దురుపయోగము చేసిన అపఖ్యాతి. బుద్ధి ఖర్మానుసారిణి...అది వారి వారి ప్రారబ్దము.
ఇందు తమ ఖజానా, మేము కొల్లగొట్టు దాఖలాలు లేవే ! అందుకే తమరు ఇతరులను శృంఖలముల బంధించి 'ఖలుడను' , 'మూర్ఖుడను' అపఖ్యాతిని పొందక,మా మాటలు చదివి ఖంగు తినక , హాయిగా పంఖా వేసుకుని, ఖండ కావ్యములు రచించుకొనుడు . కాకున్న మీరకు ఖేదముతో పిచ్చేక్కుట ఖాయం.
54 ఖ లు ఉన్న ఈ వ్యాఖ్యలు తమకు అంకితం.
ఇట్లు తమ
విధేయురాలు.
