వైరస్

వైరస్

కుక్కపిల్ల, అగ్గిపుల్ల, సబ్బుబిళ్ళ కాదేది వైరస్ కి అనర్హం... అయ్యో, ఇదేమి
కొత్త సామెతండి, అంటారా? సామెతలు కాలానుగునంగా మారాలండి. కంటికి కనిపించని ఈ
సూక్ష్మజీవి ఎన్ని కనికట్టులు చేస్తుందనుకున్నారు? దబాయించి వచ్చే ఈ

అనుకోని అతిధిని, పొగాకు మొక్కలో 1892 లో కనిపెట్టారటండి. దీనికి అస్తమాను
వాలిపోవడానికి ఒక ప్రాణి కావాలి. మనుషులు, మొక్కలు, బాక్టీరియా ఇలా ఏది
దొరికితే, దానిమీద వాలిపోయి, 'ఇంతింతై....వైరస్ అంతై...' అన్న విధంగా వృద్ధి
చెందుతుందట.



అసలు బ్రహ్మ దేవుడు మనిషిని, ప్రాణులని తయారు చేస్తుండగానే, చాటుగా ఈ వైరస్
పుట్టేసి ఉంటుంది. విశ్వామిత్ర సృష్టి అప్పుడు, మళ్లీ కొన్ని రకాలు చాటుగా
పుట్టేసి ఉంటాయి.పురాణాల్లో వీటి ప్రస్తావన ఉందో లేదో కాని, ఆదిమానవుడికి,
జలుబు చేసినప్పుడే, దీన్ని గుర్తించి ఉంటారు. పేరు తెలీదు కనుక,' జలుబుకి మందు
వాడితే వారానికి, వాడకపోతే ఏడు రోజులకి తగ్గుతుంది.... 'అని చెప్పేసి,
సరిపెట్టేసుకున్నారు. తర్వాత, హాని కలిగించే వన్నీ,' విషం' అనడం అలవాటు కనుక
వైరస్( అంతే విషపూరితం) అని చేతులు కడిగేసుకున్నారు. చిన్న DNA లేక RNA ముక్క
తప్ప, గుప్పెడు కండ లేదు, ఎంత కండ(వైరా ) కావరమండీ దీనికి. మొక్క నుంచి
మొక్కకి, మనిషి నుంచి మనిషికి.... చీమలు, దోమలు, పురుగులు, అన్నిట్లో పరకాయ
ప్రవేశం చేసి మరీ వ్యాపిస్తుంది. పోనీ, దొరికిన ఒక ప్రాణినీ తిని
ఊరుకోవచ్చుగా. రాజకీయ నాయకుల్లా దీనికి తృప్తి లేదు. ఎంత తిన్నా, ఇంకా తినాలనే
అనిపిస్తుంది. చివరికి మందులతో చావడానికయినా సిద్దపడుతుంది.

చివరికి ప్రాణం లేని కంప్యూటర్ లు, మొబైల్ లు, లప్తోప్ లు ఇతర అధునాతన
పరికరాలు ఎన్ని కనిపెట్టినా, వైరస్ కి లోకువే. యెంత పరిజ్ఞానం పెరిగితే,
వాటికి అనుగుణంగా తన DNA మార్చేసుకుని, ఊసరవల్లిలా రోంగులు మార్చి కొత్త
సవాళ్ళు విసేరేస్తుంది. ఎన్ని రూపాలో, అన్ని రూపాంతరాలు. కంప్యూటర్ నుంచి
కంప్యూటర్ కి, చేతి నుంచి చేతికి, తుమ్ము నుంచి పక్కన మనిషికి, ఇలా
హడాలగోట్టేసింది. గొప్ప గొప్ప మేధో నిధులే, 'స్వయ్న్ ఫ్లూ' భయానికి, ముక్కుకు
గుడ్డలు కట్టుకు తిరిగారు. కొత్త వైరస్- విరుగుడు- మళ్లీ కొత్త వైరస్. దీని
దుంపదెగ , ఇది మృత్యు దేవత ప్రతినిధి అయ్యుంటుంది. లేకపొతే, అస్తిత్వం లేని,
ఊతం లేనిదే స్వంతగా బతకలేని, ఇంత చిన్న ప్రాణికి అంత శక్తి ఎలా వచ్చింది, మీరే
చెప్పండి.